Saan a pabor ti Office of the Prosecutor iti International Criminal Court (ICC) iti makidkiddaw nga interim release ni sigud a president Rodrigo Duterte.
Iti sungbat ti prosecution panel nga idadauloan ni Deputy Prosecutor Mame Mandiaye Niang, impettengna kadagiti ICC judges a saanda a patgan ti kiddaw ti kampo ni Duterte nga interim release.
Para kenni Niang, kasapulan nga agtalinaed a nakabalud ni Duterte tapno saan a malapdan wenno agbalin nga alanganin ti imbestigasyon wenno court proceedings.
Malaksid iti dayta, impetteng ti nasao a prosekyusyon a kasapulan nga agtalinaed a nakabalud ti sigud a presidente tapno masigurado a sumango daytoy iti panagdengngeg nangruna ket agtultuloy a kweskwestyunaran ti pamilya daytoy ti legalidad iti legal proceedings kasta metten ti pammati dagitoy a nakidnap ni FPRRD.
Maysa pay nga impunto ni Niang ti alegasyon dagiti Duterte a makikunkunchaba ti ICC iti gobyerno iti Pilipinas nu sadino, maatap a kinuna ni Vice President Sara Duterte a mangbaybayad ti nasao nga international tribunal kadagiti fake witnesses kontra iti sigud a presidente.
Maipalagip nga naarestar ni FPRRD idi laeng bulan iti Marso nu sadino, sipud idi ket naibalud wenno nai-detain daytoyen gapu iti kaso a crimes against humanity.
Itay laeng kanikadua, pinatgan iti ICC Pre-Trial Chamber I ti panakaitantan iti confirmation of charges hearing a maangay koma inton September 23.
