Impakaammo iti Philippine National Police(PNP) a bimmaba iti 14% ti focus crimes iti pagilian sipud Hulyo agingga Setyembre ita a tawen.
Maibasar iti datos nga inruar iti nasao nga ahensya, dumanon iti 8,988 a krimen ti nailista kadagiti nasao a bulan, nababbaba ngem iti 10,430 a nailista iti kapada a period idi napan a tawen.
Kadagiti nagduduma a krimen iti pagilian, dagiti kaso iti panagrames wenno rape ti addaan iti kadaklan a bimmabaan nu sadino, manipod iti 2,280, dumanon laengin ti nailista iti 1,527.
Sarunwen daytoy ti kaso iti car theft a bimmaba iti 28%, pammapatay wenno murder a bimmaba iti 24%, kasta metten dagiti kaso nga homicide, robbery, theft, physical injury, ken motorcycle theft.
Ti panagbaba ti rekord dagiti mailislista a krimen ket maysa a pakakitaan iti naing-inget nga operasyon dagiti kameng iti pulisya kontra iti iligal a droga, loose firearms, wanted people, illegal gambling, smuggling, ken cybercrime.
