Agaramat ita ti Department of Public Works and Highways (DPWH) ti satellite data a mangmonitor kadagiti infrastructure projects.
Daytoy ket kalpasan a nagpirma daytoy iti memorandum of agreement iti Philippine Space Agency (PhilSA) idi Lunes, November 3, 2025.
Sigun kenni Public Works Secretary Vince Dizon, nalaka ti panagtitinnulong ti DPWH ken PhilSA babaen iti naaramid a katulagan.
Mainaig iti dayta, kinuna ni PhilSA officer in charge Gay Jane Perez a maaramat ti satellite imagery tapno ad-adda a nalawag iti publiko dagiti impormasion maipapan iti infrastructure projects iti pagilian.
Malaksid iti dayta, makipagtrabaho ti PhilSA iti DPWH para iti panangpataud kadagiti tools a mangmonitor iti imprastruktura, resource accounting ken project validation babaen ti panagaramat kadagiti teknolohia kas iti satellite remote sensing, artificial intelligence ken geospatial analytics.
Kabayatanna, nagaramid ti katulagan ti PhilSA iti Department of Agriculture tapno mamonitor dagiti anomalies kadagiti farm-to-market roads.
Pampenggepen metlaeng ti nasao nga ahensia a makipagtrabaho dagitoy iti Department of Education (DepEd) para iti pannakasukimat dagiti maar-aramid a classrooms ken dadduma pay nga school facilities.
