Maatap nga intoxicated wenno nakainum iti nasanger nga arak ti estudyante nga agtawen iti 19 a natnag iti creek sadiay Honeymoon- Holyghost, Baguio City iti pasado alas sais ti rabii idi November 13, 2025.
Iti panakiuman ti Bombo Radyo kenni PLt. Jennifer Ganipac, admin ti Baguio City Police Office Station 6, kinunana a nakaawat dagitoy ti awag pasado alas sais ti rabii a mangipakpaka-ammo nga adda ti maatap a natnag a maysa nga indibidual.
Gapu ti dayta, dagus dagitoy a nagturong ti nasao a “creek” tapnu agresponde kadwada ti 911 ken ti Bureau of Fire Protection.
Impeksa ni PLt. Ganipac ti kangato ti nakatnagan ti biktima ket agarup 11-12 meters.
Saan met a dakkel wenno adu ti danum ti creek idi napasamak ti insidente.
Maibasar ti initial nga report dagitoy, ti biktima ket residente sadiay Bakakeng Norte, Baguio City.
Rimuar met iti initial nga imbestigasyon ti kapulisan a ti biktima ken ti kasinsinna ket naggapu iti sabali a lugar a nakainum iti nasanger nga arak.
Nagawid met dagiti dua iti boarding ti kasinsinna sadiay Honeymoon- Holy Ghost ngem apaman a nakaawid dagitoy ket inikatna ti outer clothes-na sakbay rimuar daytoy.
Nupay kasta, sumagmamano laeng a minutos ti napalabas nakangeg metten dagiti kakaaruba-da iti kanalbuong.
Sigun iti maysa kadagiti boarder a kaaruba ti kasinsin ti biktima arigna a natumba a basuraan ti nangegna ngem idi kitaenna ket maysa daytoy a tao.
Malaksid ti dayta, kinuna ni Eduard Medel, brgy. tanod iti nasao a barangay, ita laeng nga adda ti napasamak a panakatnag sadiay.
Sigun kenkuana atapen dagitoy a nalabit agisbu wenno agsarwa ngem natnag metten daytoy.
Kinunana met a possible a nakainum iti nasanger nga arak ti nasao a biktima.
Impeksana pay a nadanunanna metten nga awanan puot ti biktima idi madama a maresrescue daytoy.
Iti panagturong ti Bombo Newsteam sadiay naimatangan a ti creek ket asideg laeng ti ruangan ti nasao a boarding house.
Addaan met daytoy iti railings nga umdas laeng a mangsarapa iti tao ngem narisgo ladta daytoy.
Iti baet dayta, natarimaan metten daytoy ken naipangato ti railings.
Mainaig ti dayta, sigun kenni PLt. Ganipac adda paylaeng iti ospital ti biktima ngem under observation daytoy para iti operasyon kalpasan a nagsagrap daytoy iti fractures iti makinkanigid a siketna.
Agtultuloy met ti imbestigasyon nu daytoy ket accidental fall wenno saan.//Bombo Noveh Organo
