Sinerrek ti National Bureau of Investigation – Cordillera Administrative Region babaen iti search warrant ti Ions hotel iti Baguio City a napanan da sigud a DPWH undersecretary Maria Catalina Cabral sakbay ti ipupusay daytoy.
Iti opisyal nga statement ti NBI, panggep ti search warrant a makaala iti ebidensiya a mabalin a manglawlawag iti rason iti ipupusay ti sigud a DPWH official.
Ti search warrant ket impaulog ni Hon. Judge Michael V. Francisco ti Regional Trial Court ti Baguio City, Branch 6 a mangipalpalubos kadagiti awtoridad a makaala iti ebidensiya iti hotel room a nagtalinaedan ni Cabral.
Karaman metlaeng a sinukimat dagiti awtoridad ti kwarto ti driver ni Cabral a ni Ricardo Hernandez.
Maipalagip a nasarakan laengen nga awan biag ti nasao nga opisyal iti Bued River, 20 agingga 30 metro ti kaunegna manipud iti kalsada idiay Camp 4, Tuba, Benguet idi Disyembre 18, 2025.
Maibasar iti resulta ti otopsiya, nagsagrap ni Cabral iti blunt force trauma gapu iti pannakatnagna.
Nupay kasta, agtultuloy latta ti imbestigasyon dagiti awtoridad mainaig iti daytoy nga insidente.
