Mangrugi inton Pebrero 2, 2026 ti panagdengngeg ti House Committee on Justice iti impeachment complaint a naipila kontra kenni President Ferdinand Marcos Jr.
Maibasar daytoy iti Notice of Meeting ita nga aldaw, Enero 28 ken pirmado ti chairperson ti komite a ni Batangas Representative Gerville Luistro.
Sigun kenni Luistro, dagiti laeng miembro ti House of Representatives ti naimbitaran a dumar-ay iti nasao a panagdengngeg.
Dinakamat ti nasao nga opisyal a kalpasan ti call to order, mangipaay daytoy iti opening statement nu sadino ditoyna nga ibinsa-binsa dagiti pagalagadan ken proseso a nasken a masurot bayat ti panagdengngeg.
Maipalagip nga adda ti dua a verified impeachment complaints a naipila kontra kenni President Marcos pakairamanan daytoy ti reklamo ni ni Atty. Andre De Jesus nga inyendorso ni House Deputy Minority Leader ken ni Pusong Pinoy Party-list Rep. Jernie Jett V. Nisay idi Enero 19.
Ti met maikadua a reklamo ket impila dagiti miembro ti Makabayan coalition nga idadauloan da Liza Largoza Maza, Teodoro Casiño, Renato Reyes Jr., Atty. Neri Colmenares, labor leader Ronaldo “Ka Jerome” Adonis ken dadduma pay nga inyendorso met da ACT Teachers Party-list Rep. Antonio Tinio, Gabriela Women’s Party-list Rep. Sarah Elago, ken Kabataan Party-list Rep. Renee Louise Co.
Nakalanad iti reklamo a nasken a maipaikkat iti pwesto ti president gapu iti betrayal of public trust, graft and corruption, ken culpable violation of the Constitution nga adda pakainaiganna iti maatap nga iregularidad iti flood control projects ti gobierno a nakairamanan dagiti sumagmamano nga opisyal.
