Rumrumwar iti rekord a kangrungaan a gapuanan dagiti mapaspasamak a kaso iti panagkettel iti bukod a biag(suicide) iti Baguio City dagiti personal a parikut pakairamanan dagiti mainaig iti pinansyal nga aspeto bayat a maikadua dagiti mainaig iti termninal illness.
Malaksid iti dayta, makitkita pay nga adda pakainaigan iti mental a salun-at ti maysa a tao ti kasasaad ti uneg ti pagtaenganda ken ti aglawlaw dagitoy.
Iti datos a naala iti Bombo Radyo, nadoble ti bilang dagiti kaso ti suicide iti Baguio City idi 2025 a dimmanon iti 47 manipod iti 24 idi 2024.
Nupay kasta, rumrumwar metlaeng a kaadwan kadagiti agketkettel iti bukodda a biag ket dagiti nagtaud iti sabali a lugar a mangidandanon laeng iti nasao a tignay iti siudad ti Baguio.
Gapu kadagiti nasao a kaso ket nangiyuswat dagiti maseknan nga opisina iti welfare check tapno matulungan dagiti agsagsagaba.
Malaksid iti dayta, agtultuloy latta ti panakaisakad ti information dissemination ken psychological education nangruna kadagiti pagadalan tapno mapalawa pay ti panakaammo ken malukatan ti umno a kapanunutan seknan iti mental health.//Bombo Jay Ann Gabrillo
