Saan a pinatgan ti International Criminal Court (ICC) Prosecution ti kiddaw ni sigud a President Rodrigo Duterte iti saanna a panang-atendar iti confirmation of charges hearing daytoy inton sumaruno a lawas.
Iti dokumento nga impablaak ti nasao a korte a napetsaan iti Pebrero 19, inyanusyoda nga awan ti resonable a rason tapno saan a makaatendar ti sigud a presidente.
Impetteng pay ti nasao a korte nga “fully capable” ken kabaelan ni sigud a President Duterte ti umatendar iti hearing daytoy.
Innayonda pay a saan a mapalubosan ti panangpalusot tapno saan a makaatendar daytoy iti panagdengngeg daytoy.
Sigun iti nasao a korte, “irrelevant” ti immunan a dinakamat ni sigud a President Duterte nga agkakapsuten daytoy.
Patien ti nasao a korte nga “physically and mentally fit” daytoy nga agatendar iti nasao a hearing.
Maipalagip a nangipila ni sigud a President Duterte ti waiver na iti saanna a panangatendar iti hearing na gapu iti edad ken kondisyon iti pisikal a bagi na.
Naituding a mangrugi ti confirmation of charges ni sigud a President Rodrigo Duterte inton umay nga Pebrero 23. // Bombo KCS
