Binalakadan ni Senate President Vicente Sotto III ni Senador Ronald “Bato” dela Rosa a dagus nga isukona ti sweldona ken dagiti allowance daytoy bayat ti agtultuloy a panag-absentna iti Senado.
Sigun kenni Sotto, nasken a suroten ni dela Rosa ti panawagan a boluntaryo nga i-waive wenno saanna nga alaen ti benepisyona iti kabiitan a panawen nangruna ta nasurok lima bulan a saan a makipaspaset kadagiti sesyon iti senado.
Immunan a nagpanawagan ni Senator JV Ejercito, chairman ti Senate Ethics Committee, nga aramiden daytoy ni dela Rosa.
Sigun kenni Ejercito, mabalin nga agbalin a basaran ti saan a panang-awat iti sweldo ken allowance tapno maibasura ti naipila nga ethics complaint kontra iti senador.
Saan a nakadar-ay ni dela Rosa iti aniaman a sesyon ti Senado sipud pay idi Nobyembre 2025, ken awan metlaeng ti panagparangna iti publiko.
Daytoy ket kasaruno dagiti damag a mapapati a nangiruar ti International Criminal Court iti warrant of arrest kontra kenni Dela Rosa mainaig iti kontrobersyal a war on drugs.
Maipalagip nga idi Pebrero 2026, nangipila iti reklamo ti grupo a Wag Kang KuCorrupt kontra kenni dela Rosa gapu iti nabayag a panag absent daytoy iti trahaho ngem agaw awat latta iti sweldo.
Kiniddaw ti nasao a grupo iti Senado a mangipatungpalda iti pormal nga imbestigasyon tapno mabigbig nu adda dagiti nalabsing a pagalagadan iti panag absent ni Dela Rosa ken maipaayan iti kaskenan a pannusa.
