TUBLAY, BENGUET – Pimmusay ti maysa a lalaki, agtawen iti 46 kalpasan a natnag ti naglugananda a van iti rangkis sadiay Asin Road, Barangay Tuel, Tublay Benguet idi Martes, April 28.
Iti pannakiuman ti Bombo Radyo kenni PCPT. Angeline Dongpaen ti Tublay Municipal Police Station, kinunana nga agarup 200 meters ti kauneg ti rangkis a natnagan ti lugan.
Walo nga indibidual ti nakalugan iti daytoy, pakairamanan ti driver.
Iti imbestigasyon dagiti kapulisan, nagtaud dagiti biktima iti Ansagan, Tuba ken paturongda iti lamay ti maysa a kabagianda idiay Barangay Bagong, Sablan idi napasamak ti insidente.
Sigun kenni PCPT. Dongpaen, mechanical error ti makitkitada a rason ken saan nga overloading.
Nagsagrap dagiti biktima ti sugat iti nagduduma paset ti bagbagi dagitoy bayat a maysa ti saan a nagsagrap iti injury.
Dagus a naiturong dagiti biktima iti ospital babaen iti panagresponde dagiti opisiales ti Barangay Tuel, La Trinidad MPS, Tublay MPS ken dagiti dadduma a maseknan nga otoridad.
Iti agdama, dadduma kadagiti biktima ti nakaruar iti ospital bayat a lima ti agtaltalinaed nga agpatpattaming.
Agtultuloy paylaeng ti imbestigasyon dagiti otoridad iti napasamak nga insidente.
Kabayatanna, agpalpalagip ni PCPT. Dongpaen kadagiti amin a motorista nga agannad iti panagmaneho, nangruna ita a panagtutudo tapno maliklikan ti kapada nga insidente. //mp4
