Umap-apila dagiti concerned citizens kadagit maseknan nga ahensiya kas iti DPWH-Cordiller ken LGUs ti pannakatarimaan ti kalsada idiay Lamut Junction, Beckel, La Trinidad a nabayeen a nadadael gapu iti napigsa a bagyo.
Agingga gamin ita, saan pay laeng a natartarimaan daytoy.
Gapu iti dayta, maysa a menor-de edad (13-anyos) a lalaki ti aksidente a natnag ken pimmusay iti nargaay a paset ti kalsada iti nasao a lugar.
Sigun kadagiti concerned citizens, nabayagen a nakatengga ti nasao a kalsada.
Delikado pay daytoy nangruna iti rabii gapu ta tali laeng ken caution tapes laeng ti naikabil kas barrier wenno harang iti nasao a kalsada – banag a saan a pamilyar nangnagruna kadagiti agdadamo nga agdalyasat iti nasao a lugar.
Iti imbestigasyon ti kapulisan, paturong iti viewdeck ti nasao a lugar ti biktima a pimmusay tapno agpicture aramatda ti bike da idi napasamak ti insidente.
Sigun kenni PMaj Avelmar Renan Garambas, Deputy Chief of Police ti La Trinidad Municipal Police Station, adda ti duwa a kadwa ti biktima ti napasamak ti insidente.
Sigun iti nakalapda nga impormasyon, na-‘ lost control’ ti bisekleta ti biktima a nangitunda iti pannakatnag daytoy iti agarup 30 metro a kauneg.
Iti kanayunan nga impormasyo a nakalap ti Bombo Radyo Newsteam iti ground, maatap a nag-slide daytoy kalpasan a nakitaan ti skidmark ti nakapasamakan ti insidente.
Nakahelmet wenno head gear met ti biktima ngem gapu iti impact ti pannakatnag daytoy ket naideklara a dead on arrival daytoy gapu ti internal celebral hemorrhage wennu Tama iti ulo.
Iti agdama, nakamasayag ti biktima iti pagtaengan dagitoy a saanen a mainaganan iti privacy ti pamilya ti biktima.
Inlawlawag ni PMaj Garambas nga immuna a nakapagresponde ti FVP ti kapulisan idiay Barangay Beckel no sadino sinapulda pay ti pagnaanda tapno maalada ti bagi ti biktima iti baba ti kalsada.
Bayat a maururay ti isasangpet ti Emegency Medical Service (EMS), nagdesisyon dagiti passersby, residente, ken PNP responders nga i-a-on daytoy.
Iti agdama, padpadasen nga alaen ti Bombo Newsteam ti benneg ti maseknan nga ahensya seknan iti planoda a pannakatarimaan ti kalsada tapno maliklikan ti kapada nga insidente iti masakbayan.
Agtul-tuloy a one-lane passable ti nasao a kalsada kadagiti motorista.
Mabalballakadan met amin a dumalyasat nga agannadda ken agridamda kadagiti road barriers, signages, ken dadduma pay kadagiti kalkalsada. //Bombo Noveh Organo
