Imbinglay ni Mr. Jeffrrey Rubino, Election Officer ti Sablan, Benguet nga ‘orderly’ wenno naurnos ti panangipatungpal dagitoy iti maudi nga aldaw ti voters registration idiay Sablan, Benguet.
Sigun kenkuana, saan a kas kadagiti dadduma a lugar nga addu dagiti ‘last minute’ a nagturong kadagiti opisinada.
Inlawlawag ni Rubino a ti sitwasyon ti panagrehistro idiay Sablan ken saan a kapada kadagiti luglugar a nalawa ti sakupenda.
Dinakamatna a nasayaaten kadakuada nu adda ti sangapulo nga agturong iti opisinada wenno kadagiti offsite registration tapno agparehistro.
Imbinglay pay ti nasao nga opisyal a dumanon iti 42 ti nairekord da a nagparehistro iti maudi nga aldaw ti voters registration. Sigun kenkuan, dakkelen daytoy a bilang kadakuada ken innawaganna pay daytoy ti opisyal a “milestone” para kadakuada ti nasao a bilang.
COMELEC CHALLENGES
Imbinglay ni Mr. Jeffrey Rubino, Election Officer ti Sablan, Benguet a karit kadakuada ti panangalukoy kadagiti residente idiay Sablan nga agparehistro iti umuna a bulbulan ti registration.
Sigun kenkuana, awan ti agturturong iti opisina dagitoy nga agparehistro ken nu kadagiti maudi nga bulan wenno aldaw laeng dagitoy nga agkamkamakam nga agparehistro.
Innayonna nga araramidenda dagiti nagduduma a pamay-an kas iti panagbisita kadagiti pagadalan, nagduduma a babbarangay, ken luglugar tapno iparehistro dagitoy.
Sigun kenkuana, agakomodar pay ti opisinada iti aldaw ti Sabado ken Domingo ngem kaskasdi nga awan ti agturong tapno agparehistro.
Maysa kadagiti makitkita dagitoy ket ti posible a kaawan interesado dagiti residente nga agparehistro ken ti damag a pannakaitantan manen ti Barangay and Sangguniang Kabataan Election (BSKE) no sadino, inlawlawagna a posible a pinanunot dagiti residente a gapu ta maitantan ti eleksyon isu’t gapunna nga uray saan dagitoyen nga agparehistro. //bombokaren.c.s
