Imbasura iti maysa a korte iti siudad ti Baguio ti petision iti uppat nga aktibista iti Cordillera People’s Alliance a kwestunaren ti pannakaawagda kas terorista iti Anti-Terrorism Council idi tawen 2023.
Iti pangngedeng nga inruar ni Judge Hilarion Belmes idi Abril 30, kinuna iti korte a napaay da Windel Bolinget ken tallo pay a kaduana nga aktibista a paneknekan a naaddaan iti grave abuse of discretion ti Anti-Terrorism Council iti panangiruar iti Resolution No. 41 a mainaig kadakuada iti panagrekrut ken panagsuporta kadagiti rebelde a komunista.
Sigun kadagiti petitioner, naamuanda laeng ti terrorist designation dagitoy idi na-freeze dagiti bank account dagitoy idi Hulio 2023.
Impaganetgetda metlaeng a nalabsing iti proseso ti karbenganda iti due process.
Nupay kasta, kinuna iti korte nga awan ti ebidensia a mangipakpakita nga agtignay ti Anti-Terrorism Council nga addaan iti saan a nasayaat nga intension wenno wagas nga arbitrary.
Naituding nga iyapela dagiti aktibista ti nasao a desision.
