Impeksa ni Mayor Benjamin Magalong nga agbain met kuma dagiti agtagikua iti establisimiento kasaruno ti adu a panag-leak iti sewerage iti siudad nangruna iti Central Business District.
Iti pannakiuman iti media kenkuana, inyebkasna nga adu dagiti parikut kadagiti sewers iti siudad gapu iti kinaawan iti disiplina nu sadinno adu dagiti basura a maibelbelleng kadagiti sewers kasta metlaeng kadagiti kanal.
Naobserbaran a dagiti sewerline ti kadawyan a mapulpulatan ti basura , langis, mantika , diapers ken daduma pay a kita ti basura a mangituntunda iti panakapullat dagiti kanal ken panaglupyas dagiti sewerlines.
Kabayatanna, impeksa ni Atty. Rhenan Diwas, dadaulo ti City Environment and Parks Management Office (CEPMO), a naabutan ti sumagmamano a paset ti sewer line isu’t gapuna a makauneg ti tudo ken rumrumwar daytoy kadagiti sewer manholes.
Innayonna a kaaduan kadagiti sewerlines ket naaramid idi paylaeng 1980s.
Sigun kenkuana, kasapulan ti agarup P900-milyon para iti total rehabilitation dagiti main sewer pipe ti Central Business District maibasar iti panagadal dagiti engineers. | via Bombo Noveh Organo
