Pagdandanagan dagiti Philippine defense officials ken maritime experts ti posible manen a pangrugiyan ti “lawfare” campaign ti China.
Daytoy ket kalpasan a kinuna dagiti scholars ti maysa a Symposium idiay China a kukua ti China ti Batanes Islands babaen ti Taiwan.
Iti maysa a social media post, kinuna ti maritime transparency initiative a SeaLight nga ibagbaga dagiti eskolar a ti panangtagikua ti Pilipinas iti Batanes ket awanan ti historikal ken legal a batayan no sadino, ti nasao nga isla ket kukua ti China.
Ti Symposium nga insayangkat dagiti eskolar idi Hunio 30 ket indauluan ti Jinan University sadiay Guangzhou.
Sigun iti SeaLight, inkeddeng dagiti nakipaset iti Symposium a ti Batanes ket natural geographical extension ti Taiwan a sigun kadakuada ket kukua ti China.
Innayonda pay nga awan ti legal a kinapudno ti Japan-Philippines maritime delimitation negotiations iti lugar.
Sigun kenni SeaLight Executive Director Raymond Powell, arigna nga agar-armid ti China iti legal a naratibo para iti aramidenda nga addang iti masakbayan.
Inlawlawag ni Powel nga iti baet nga awan kadagiti Chinese government official ti mangibagbaga a kukuada ti Batanes, posible latta a daytoy ti pagrugian ti panagtagikuda iti nasao nga isla.
Kabayatanna, inlaksid ni National Task Force for the West Philippine Sea spokesperson Commodore Jay Tarriela ti konklusyon dagiti Chinese scholars.
Sigun kenni Tarriela, posible a daytoy ti maysa a panangpadas ti China a palawaen ti agawenda a teretoryo ti pagilian.
Impasigurado ti opisial nga agtultuloy ti panagpatrolia ti Philippine Coast Guard (PCG) ken Armed Forces of the Philippines (AFP) iti Luzon Strait ken ti aglawlaw ti Batanes bayat ti panangisayangkatda iti maritime domain awareness (MDA) flights tapno mamonitor no adda man ti pangserrek ti China sadiay Batanes.
