Inyebkas ni Bokod Mayor Erik Donn Ignacio ti tarigagayna a masolbaren ti isyu ti boundaries ti Bokod ken kadagiti kabangibang a munisipyo kas iti Atok, Itogon, ken Kabayan.
Iti pannakiuman ti Bombo Newsteam kenkuana, dinakamatna a naipresentarda metten dagiti proposal dagitoy iti lokal a gobyerno ti Kabayan. Iti met kaso da iti Itogon, kinunana a pending pay laeng daytoy.
Innayon ni Mayor Ignacio a puntiryada a sakbay nga agleppas ti tawen, masolbar ti pakaseknan dagitoy iti boundaries.
Sigun kenkuana, agarup 60 agingga 70 milyon ti masaysayang tunggal tawen gapu iti saan a maok-okuparan nga espasyo a dumanon iti agarup 2000 nga ektarya.
Innayonna a mabalin gamin daytoy a pagpatakderan kadagiti pagadalan ken multipurpose buildings.
Inyebkas ni Mayor Ignacio ti namnamana a marisot kuman ti nasao nga isyu ita a termino tapno maaramat metten ti nasao nga espasyo.
Innayonna a napateg a masolbar ti nasao nga isyu tapno saanen a marigatan dagiti sumaruno a henerasyon ken tapno agnumar metten dagiti maseknan a munisipyo iti espasyo a mapagtatalantanan.
Kagidan dayta, impetteng ti mayor nga awan iti panunotna nu anya a munisipyo iti makaala iti nalawlawa a porsyon, ken kinunana a saanda a piliten dagiti apektado a komunidad nu anya ti pilienda a munisipyo a kayatda a pakaibilangan.
Namnamaen met daytoy a maaddaan iti win-win solution iti nagbaetan dagiti karaman a munispyo. //bombokaren.c.sapirao
