Narisuten ti sumagmamano a dekada a riri iti nagbeddengan dagiti munisipyu iti Cervantes idiay Ilocos Sur ken Mankayan, Benguet kalpasan a naaprobaran ti maysa a resolusion para iti natalna a pannakarisut ti riri.
Maragsakan dagiti opisial iti dua a munisipyu iti katulagan, nga inladawanda a dakkel a balligi ti agtultuloy a dayalogo ken panagtinnulong a nangitunda iti nasayaat a solusyon.
Manamnama a mapasayaat ti katulagan iti panangimanehar kadagiti lugar a nagbeddengan ken mapasayaat ti relasion dagiti komunidad.
Sigun kenni Ilocos Sur Board Member Pablito Sanidad Jr., chair iti provincial council committee on boundary disputes, maysa a pakasaritaan nga addang ti resolusion a mangipakpakita a mabalin a marisut dagiti riribuk iti teritorio babaen iti maysa a “win-win” a katulagan imbes a mapabayag ti riri.
Namnamaen met ni Sanidad a marisut metlaeng ti kapada a wagas ti dadduma a boundary disputes iti probinsia kadagiti kaarubada a probinsia.
