LA TRINIDAD, BENGUET – Impaayan ti Department of Social Welfare and Development-Cordillera iti tulong dagiti pamilya ti pimmusay ken nadangran iti napasamak a panagregaay sadiay Barangay Shilan, La Trinidad, Benguet idi Mierkules, Agosto 06, 2026.
Sigun kenni Department of Social Welfare and Development-Cordillera Disaster Risk Reduction and Management Officer Novelle Ongat, naipaayan iti sag-P10,000 ti pamilya dagiti dua a pimmusay, bayat a P5,000 ti naipaay iti maysa a biktima nga agpatpattaming iti ospital.
Impanamnama ni Ongat nga iproseso ti ahensiya ti kanayunan a death, burial ken medical assistance para iti pamilya dagiti biktima.
Malaksid iti dayta, naipaayan metlaeng dagitoy iti kanayunan a tulong babaen iti La Trinidad Municipal Social Welfare and Development Office.
Maipalagip a pimmusay dagiti dua bayat a dangran ti maysa kalpasan a nagaburan ti daga ti resturant a pagtatrabahoan dagitoy.
Mangmangan dagiti biktima idi kellaat a nagraay ti daga iti ngato a paset ti restaurant.
Sigun kenni Mayor Roderick Awingan, ti agtultuloy a tudo gapu iti Tropical Cyclones Luis ken Maymay ti nangpalukneng iti daga a nangitunda iti panagreggaay.
Nabigbig dagiti pimmusay a da Jerry Binay-an Agbuya, 66-anyos; Lemar Gawidan Ciano, 31-anyos, bayat a nakalasat ken agpatpattaming iti ospital ni Dino Binay-an Agbuya, 55-anyos.
Amin dagiti biktima ket agkakabagyan manipud sadiay Kapangan, Benguet.//mp4
