Manarimaan ti imbestigasion dagiti kameng iti pulisia iti napasamak a carnapping iti Junction iti San Vicente ken Balsigan iti siudad ti Baguio iti parbangon idi Agosto 27.
Ti complainant ket agtawen iti 50 a lalaki, negosiante, ken residente iti Upper Liwanag Loakan, Baguio City.
Iti report ti pulisya, ti napasamak nga insidente ket impadamag iti kabsatna a lalaki nga agtawen iti 52, kameng iti ahensia iti BJMP a nakadestino iti La Trinidad District Jail, Male Dormitory ken residente iti San Vicente, Baguio City nga isut nangimaneho ti lugan idi napasamak ti insidente.
Ti lugan ket maysa a Toyota Innova 2.5, puraw nga addaan iti plate number nga AYU 753, ken sigud a maar-aramat kas taxi.
Rumrummuar iti imbestigasion iti pulisia nga imparada ti drayber ti lugan iti Junction idiay San Vicente ken Balsigan, Baguio City sakbay a nagturong iti asideg iti kantina tapno gumatang iti gatas ken sabon.
Kinuna iti drayber a sakbay daytoy a pimmanaw iti nagparadaanna iti lugan, in-lock na pay daytoy sakbay a nagawid iti pagnanaedanna.
Iti kabigatan, nagsubli ti drayber iti nagparadaanna ken nadiskobrena nga awanen ti lugan iti lugar.
Dagos a nagturong iti Barangay San Vicente tapno buyaen ti CCTV footage.
Apaman a na-reviewna ti CCTV footage, naobserbaranna ti maysa a lalaki nga immuneg iti lugan ken inmanehona paturong idiay Barangay Balsigan.
Iti agdama, ar-aramiden ti pulisia ti kabaelanda tapno masarakan ken mabigbig ti kinasiasino ti suspek ken ti nagturongan ti lugan babaen iti panagreviewda pay kadagiti kanayunan a CCTV footage.|via Bombo Noveh Organo
