Kinuwestyunar ni ACT Teachers party-list Rep. Antonio Tinio ni Department of Agriculture (DA) Secretary Francisco Tiu Laurel seknan iti nasurok P1 bilion a pondo para iti farm-to-market roads iti probinsia iti Benguet iti sumaruno a tawen.
Iti panagdengngeg iti House Committee on Appropriations iti budget iti Department of Agriculture nga aggatad iti P198.4 billion iti sumaruno a tawen, dinamag ni Tinio ti P16 billion a pondo para iti farm-to-market road nga ipatungpal iti ahensia iti tawen 2027.
Nupay kasta, binabalaw ni Tinio ti uppat a farm-to-market projects nga aggatad iti P500 milyon, P150 milyon, P106 milyon ken P100 milyon iti nagduduma a barangay iti Benguet malaksid iti P250 milyon idiay Mountain Province.
Kinuna ni Tinio a dumanon iti P1.5 billion ti nailatang a pondo para iti farm-to-market iti pakabuklan iti rehion Cordillera ngem masdaaw ti mammanday-linteg gaputa nasurok P1 bilion ti nasao a gatad ket nailatang iti probinsia iti Benguet.
Inlawlawag met ni Laurel a kurang ti farm-to-market iti nasao a lugar a maysa kadagiti rason nu apay a saan a maibibiahe dagiti mannalon dagiti apitda iti palengke ken madaddadael laeng dagitoy.
Malaksid iti daytoy, kasapulan metlaeng dagiti farm-to-market gaputa mangibangon ti ahensia iti majory storage ken processing facilities iti Benguet State University tapno matulongan dagiti mannalon iti nasao a probinsia.
Nupay kasta, kinuna ni Tinio a kwestyunable paylaeng ti farm-to-market nga ibangon iti DA iti sumaruno a tawen iti Benguet gaputa ti napondoan iti P500 milion ket addaanen iti kalsada.
