Nangipatungpal iti libre nga executive check-up kadagiti senior citizens a marigatan iti pinansial ni Senador Lito Lapid.
Ti nasao a libre nga executive check-up ket maysa kadagiti isaksakad ti nasao a senador nga adda iti sidung ti Senate Bill No. 2433 no sadinno babaen ti daytoy ket maipaayan ti libre a medikal check-up dagiti agtawen ti 60 agpangato a Pilipino a maibagbaga a “maralita” iti City wenno Municipal Social Welfare and Development Office.
Saklaw ti libre a check-up ti libre a consultation kadagiti doktor, libre a laboratory tests ken dadduma pay a panagsukimat tapno “maagapan” dagiti anyaman a sakit.
Maipatungpal daytoy kadagiti public hospitals, Department of Health (DOH) Hospital, rural health units ken pribado nga ospital nga accredited ti gobierno.
Maangay daytoy iti maminsan iti tunggal tallo a tawen ken maipaayan prayoridad dagiti bedridden ken dagiti agindeg iti addayo a lugar.
Impeksa ni Lapid nga adu pay dagiti natataengan ti saan a makapagpa-check-up gapu iti kinangina ti babayadan.
Innayonna a numan pay adda dagiti linteg a nabukel a mangtultulong kadagitoy ngem kaaduan latta kadagitoy ket saan a kabaelan nga agpacheck-up.
Sigun pay kenkuana, napateg ti nasapa a panagpataming tapno saan a kumaro ti sagsagabaenda ken saanen a dumakkel pay ti gastos.
Ti kangrunaan a panggep iti nasao a singasing ket masigurado, a numan pay marigrigat ket addaan iti karbengan nga agpataming ken maaywanan pay ti salun-at nangruna kadagiti natataengan.
