Dagos a naipatungpal ita a malem ti search and rescue operation idiay Lubuagan, Kalinga para kenni Japer “Sidu’” Cawi Pallogan , maysa a construction worker nga agtawen iti 20 a maatap a naiyanud bayat iti panagbalasiwna iti Chico River idiay Begwang, Sukiap, Tanglag, Lubuagan, alas-7:30 ti agsapa ita nga aldaw.
Sigun iti pablaak ti lokal a gobyerno ti Lubuagan, kinunada a sigun iti inisyal a report dagiti otoridad, pinanggep ni Pallogan a languyen ti nasao a karayan tapno makaballasiw daytoy ngem maatap a naiyanud daytoy gapu iti napigsa a pegges ti danum iti nasao a karayan.
Narekober met dagiti kapulisan dagiti kagawaan ti biktima kas iti cellphone, pares a tsinelas, kalugong, ken bag daytoy.
Kalpasan a naawatda ti report, dagos a nangipatungpal ti search and rescue operation ti Municipal Disaster Risk Reduction and Management Council (MDRRMC), Municipal Health Office of Lubuagan, ken BFP- Lubuagan Fire Station.
Nagkiddawda metlaengen iti assistance manipud iti Kalinga Provincial Disaster Risk Reduction and Management Office (PDRRMO) ken Philippine Coast Guard–Kalinga Extension Office tapno mang-augment iti mannarimaan a panangsarak iti biktima.
