Impeksa ti Save Apayao Peoples Organization (#SAPO) ken lokal a gobyerno ti Talifugo ti panagtubngarda iti panngep a mining exploration ti OceanaGold and Copper Fields Mining Corporation (CFMC) ken dadduma a korporasyon iti munisipyo ti Conner, Apayao.
Iti pannakiuman ti Bombo Radyo kada Ptr. Primo Tacpi, Punong Barangay ti Talifugo, maysa kadagiti barangay a maapektaran iti kanito nga agtuloy ti panagminas sadiay, ken Christina Moyaen, dadaulo ti Save Apayao People’s Organization, inyebkasda ti nainget a panagtubngarda iti mapangpanggep nga exploration idiay Apayao.
Sigun kenni Moyaen, agarup pito a barangay iti nasao a munisipyo ti maapektaran iti mapangpanggep nga exploration. Dinakamatna pay a dua ti aplikasyon ti OceanaGold and Copper Fields Mining Corporation (CFMC) a pagminasanda nu sadino dumanon iti 1,944 hectares ti sakupen ti umuna nga aplikasyonda ken agarup 14,000 hectares met iti maikadua nga aplikasyon.
Sigun kenni Moyaen, immunan a nagaplikar ti OceanaGold iti panagminas iti lugarda iti 2005 ngem tinubngar daytoy dagiti umili isu’t gapunna a nagsardengda iti 2008.
Nupay kasta, nagsubli dagitoy idi 2024. Iti agdama, mangipatpatungpal dagitoy iti IEC iti nasao a lugar.
Impeksa met ni Moyaen nga apaman nga exploration laeng ti mapagsasaritaan, saanda latta a kayat a maipatungpal daytoy gapu ta maysa nga Indigenous People Community ti ili da a Conner.
Innayonna pay a ti Conner ket mabigbigbig kas Rice Granary ti Upper Apayao ken Fruit Basket ti Apayao ken impettengna a madadael dagitoy pakairamanan dagiti pagbibiyaganda apaman a mapalubosan ti exploration iti nasao a munisipyo.
INTAY DENGGEN TI PASET TI PANNARITA NI CHRISTINA MOYAEN, DADAULO TI SAVE APAYAO PEOPLE’S ORGANIZATION
Sigun met kenni Punong Barangay Tacpi, ti kangrunaan a pagbibiyaganda idiay Talifugo ket ti panagtalon. Impeksana a daytoy ti makagapo nu apay a saanda a kayat a palubosan ti exploration idiay, gapu ta ti panagtalon a pagbibiyaganda ti maisakripisyo. //kcs//
INTAY MET DENGGEN TI PASET TI PANNARITA NI PTR. PRIMO TACPI, PUNONG BARANGAY TI TALIFUGO, CONNER, IFUGAO
