Naipasidung iti forensic examination dagiti abo na naisumitir iti pulisya manipud kadagiti pet owners a mapapati a biktima iti kontrobersiyal a pet crematorium idiay Bacoor City, Cavite.
Panggep ti nasao nga examination a bigbigen nu pudno a nagtaud kadagiti tarakenda nga aso ken pusa dagiti inted kadakuada ti nasao a pasilidad.
Sigun kenni Philippine National Police Spokersperson Colonel Allan Rae Co a naipatuloden dagiti abo iti forensic group ti Cavite.
Kabayatanna, impeksa ti PNP a posible nga Estafa ti agbalin a basaran dagiti kaso a maipila kadagiti maduktalan a karaman iti nasao nga issue.
Sigun kenni Co, agtultuloy pay laeng ti panagadal ti otoridad nu adda dagiti dadduma pay a kaso a mabalin a maipila iti makinkukua iti pet crematorium.
Maipalagip a nadiskobre dagiti natay nga aso ken pusa iti maysa a bakante a lote iti igid ti kalsada idiay San Jose del Monte City, Bulacan a maatap a naibelleng imbes a maipasidung iti cremation service.
Imimbestigaran metlaeng dagitoy ti maysa pay a naduktalan a dumping site iti nasao metlaeng a lugar.
