Nangipaulog ni Baguio City Mayor Benjamin Magalong iti Executive Order No. 177, series of 2026, tapno mabukel ti Baguio Imported Agricultural Crop Commodities Compliance and Monitoring (BIACOMM) Task Force ita a bulan ti Nobiembre.
Pangep daytoy a mangipatungpal kadagiti pagannurotan para iti panangmonitor, inspeksion, panangidokumento ken panangberipikar kadagiti imported agricultural crop commodities a mailaklako iti siudad.
Indauloan ti Mayor ti nasao a task force, bayat a ti chief ti Committee on Market, Trade, Commerce and Agriculture ti City Council ti nagserbi a Vice-chairperson.
Ti City Veterinary and Agriculture Office (CVAO) ti agserbi met kas action officer ken technical secretariat iti pannakaiimplementar daytoy.
Karaman kadagiti kameng ti task force dagiti nagduduma nga opisina ti lokal a gobierno, Baguio City Police Office, Department of Agriculture-Cordillera, Bureau of Plant Industry, dagiti pannakabagi dagiti farmers’ cooperatives and associations ken Highly Urbanized City Agriculture and Fisheries Council.
Saklawen daytoy ti amin a kita ti agricultural products a kas iti prutas,nateng, root crops, grains, herbs, spices ken dadduma pay nga agricultural products.
Saan a karaman ditoy dagiti karne, poultry, livestock products, ikan ken dadduma pay a produkto a saklawen dagiti naisangsangayan a linteg ken ordinansa.
Sigun iti executive order, mangisayangkat ti task force iti regular a panangsukisok ken inspeksion iti publiko ken pribado a merkado, trading centers, warehouses, satellite markets ken dadduma pay nga establisiemento a paglaklakoan dagiti imported agricultural products.
Saklawen met ti programa ti panangberipikar kadagiti dokumento, panangipila iti inventory ken panangkita no nasurot dagiti sanitary ken phytosanitary regulations ken dadduma pay a pagannurotan iti panag-angkat.
Imbilin met ti nasao nga order kadagiti aglaklako, traders, wholesalers ken retailers a nalawag a mailasin dagiti imported a produkto manipud kadagiti lokal a napataud a mula babaen kadagiti label, signage wenno dadduma pay a pamay-an.
Kabayatanna, dagiti kaso a pakairamanan ti maatap a panag-smuggle, panangpeke kadagiti dokumento ken saan a pudno a panangiparang iti nagtaudan ti produkto ket idokumento ken iserrek dagiti maseknan a national government agencies para iti imbestigasion.
Nabukel ti task force iti tengnga dagiti napalabas a reklamo ken alegasyon maipapan iti panaglako kadagiti imported ken mapagduaduaan nga smuggled a nateng iti Baguio Public Market ken dadduma pay a paglaklakoan iti siudad.
Babaen iti BIACOMM Task Force, manamnama a mapapigsa ti panangmonitor kadagiti naiyangkat a produkto ken masigurado a masurot dagiti pagannurotan iti panagilako kadagitoy.// Bombo Khey Reparip
