TUBA, BENGUET – Napasamak ti maysa a vehicular traffic accident iti Marcos Highway, Philippine Rabbit Compound, Poblacion, Tuba, Benguet idi Lunes, Nobiembre 16, 2026.
Karaman iti insidente ti maysa a 10-wheeler Isuzu wing van truck nga immaneho ti 45-anyos a lalaki, truck driver ken residente ti San Vicente, Sto. Tomas, Batangas.
Maibasar iti inisyal nga impormasyon, bimmangga ti nasao a truck iti maysa a warehouse iti uneg ti Philippine Rabbit Compound, a nangitunda iti pannakadangran dagiti sumagmamano nga indibidual nga adda iti nasao a lugar.
Naglaun ti truck iti galon ken drum nga addaan iti used oil idi napasamak ti insidente.
Sigun pay iti inisyal nga imbestigasyon, napasaran ti truck ti mechanical defect wenno loose brake.
Dagus a naiturong dagiti nadangran nga indibidual iti ospital tapno maipaay ti medikal a tulong. Karaman iti naiturong iti ospital ti driver ken ti truck helper.
Dagus a nagresponde iti lugar dagiti personnel ti Tuba Municipal Police Station (MPS), Tuba Municipal Disaster Risk Reduction and Management Office (MDRRMO), Tuba Bureau of Fire Protection (BFP), ken 911-Baguio.
Agtultuloy paylang ti imbestigasyon tapno maamoan dagiti amin a napasamak, rason ken dagiti indibidual nairaman iti nasao nga insidente
Nagpalagip met dagiti otoridad kadagiti motorista a nasayaat a kitaen ken siguraduen ti kondisyon dagiti lugan sakbay a rumuar iti kalsada, nangruna kadagiti nadagsen ken dadduma pay a commercial vehicles, tapno maliklikan dagiti kapada a disgrasya.// Bombo Khey Reparip











