--Ads--

CORDILLERA REGION – Ngimmato iti 53% ti kaso ti dengue iti rehiyon Cordillera manipud Enero 4 agingga Nobyembre 7,2026 sigun iti Department of Health-Cordillera.


Sigun kenni Victoria Malicdan, Nurse V manipud Regional Epidemiology and Surveillance Unit iti DOH-CAR, dumanon iti 11,941 dagiti nairekord a kaso ti dengue iti rehiyon iti las-ud ti 11 a bulan iti agdama a tawen, pakairamanan ti 27 a pimmusay no sadino, kaadoan kadagiti nairekord a kaso ket dagiti lallaki.


Sigun kenkuana, maysa kadagiti rason ti panagngato dagiti kaso ket ti napasaran a napigsa a panagtudo iti rehiyon kadagiti napalpalabas a bulan.


Kabayatanna, impeksana a saan a rumbeng nga agbalin a kampante ti publiko uray a mapaspasaran ti very strong El Niño, gapu ta posible latta ti panagdakkel ken panagadu dagiti kaso ti dengue kadagiti sumarsaruno a lawas wenno bulan.


Inlawlawagna a saan laeng a panagtudo ti mabalin a mangitunda iti panagadu dagiti lamok, no di ket pakairamanan met ti saan a nasayaat a panangidulin kadagiti danum iti pagtaengan.


Gapu iti daytoy, impalagipna iti publiko ti kinapateg ti panangidulin kadagiti mausar a danum iti nasayaat ken natalged a pagikabilan tapno maliklikan a pagitlogan dagiti lamok.


Impeksana met a rumbeng nga agtultuloy ti panagdalus iti aglawlaw, nangruna kadagiti lugar a mabalin a pagakumulan ti danum kas kadagiti lata, gulong, paso, balde ken dadduma pay a pagikabilan ti danum.


Impeksana met ti kinapateg ti panangipatungpal iti uppat a pamay-an iti pannakaliklik iti dengue, a pakairamanan ti Taob, Taktak, Tuyo ken Takip.


Babaen iti Taob, masapul a taoben dagiti pagikabilan ti danum a saan a maus-usar tapno maikkat ti naipundar a danum.


Ti Taktak ket tumutukoy iti panangikkat kadagiti danum a naipundar kadagiti pagikabilan, bayat a ti Tuyo ket ti panangipatalged a mamaga dagiti lugar a mabalin a pagitlogan dagiti lamok.


Ti Takip met ket ti panangabbong wenno panangserra kadagiti pagikabilan ti danum tapno maliklikan a makastrek dagiti lamok ken mangitlog iti dayta.


Inlawlawagna pay a nasken a saan laeng a dagiti opisina ti gobierno ti mangaramid kadagiti programa para iti pannakaliklik iti dengue, no di ket masapul met ti aktibo a pannakipaset dagiti residente iti tunggal komunidad.


Kabayatanna, impakaammona a nangipaulog ti DOH-CAR kadagiti advisories ken agtultuloy dagiti information dissemination activities ken trainings tapno maipaay iti publiko dagiti nasken nga impormasyon maipanggep iti dengue ken dagiti pamay-an tapno maliklikan daytoy.


Impalagipna met a masapul a daddumaen ti publiko dagiti sintomas ti dengue kas iti nangato a gurigor, sakit ti ulo, panagsakit ti bagi ken kasla pannakapuy, tapno dagus a makapan iti pagagasan para iti umiso a panangamiris ken panangagas.


Impalagip ti DOH-CAR a saan a masapul nga urayen ti panagrugi dagiti sintomas tapno agaramid iti aksyon, gapu ta ti regular a panagdalus ken panangikkat kadagiti pagitlogan dagiti lamok ket napateg a wagas tapno mapabassit ti posibilidad ti pannakapasakit iti dengue. | via Bombo Khey Reparip