Papapigsaen dagiti ahensia iti gobierno ti kampania iti impormasion seknan iti El Niño tapno maisagana ti publiko iti posible nga epekto daytoy iti salun-at, suplay iti danum ken seguridad iti taraon.
Iti naisayangkat a Kapihan sa Baguio forum nga indauloan iti Department of Health (DOH) Cordillera idi Nobiembre 17, impeksa ni Engr. Mar Santos iti PAGASA-Baguio nga agdama a mapaspasaran ti very strong El Niño iti tropical Pacific a manamnama nga agtuloy agingga iti umuna a paset iti 2027.
Sigun kenni Santos, manamnama a bummaba iti kinaadu iti danum iti pagilian manipod Nobiembre 2026 agingga Abril 2027, a mabalin a mangitunda iti kinakurang iti danum, pannakadadael iti agrikultura ken pangta iti salun-at gapu iti nakaro a kinabara.
Maibasar iti PAGASA outlook, makapasar iti dry spell ti innem a probinsia iti Cordillera iti panagdanon iti ngudo iti Disiembre. Kabayatanna, manamnama a dumanon iti 87 a probinsia iti pagilian a makapasar iti meteorological drought iti panagdanon iti Marso 2027.
Manamnama metlaeng ti nangatngato a temperatura iti kaaduan a paset iti pagilian.
Posible a dumanon iti 39.5 degrees Celsius ti kangatwan a temperatura iti nababa a lugar idiay Mindanao inton Abril 2027, bayat a mabalin met a bummaba iti 9.2 degrees Celsius ti temperatura iti nangangato a lugar iti Luzon inton Enero.
Inlawlawag metlaeng ni Santos ti kinapateg iti heat index kas basaran iti mapaspasaran a pudot iti bagi, a naidumduma iti aktual a temperatura iti angin ken nakadepende metlaeng iti humidity.
Kabayatanna, mapatta-patta a dua agingga innem a tropical cyclone laeng ti mabalin a mabukel wenno sumrek iti Philippine Area of Responsibility (PAR) manipod inton Nobiembre 2026 agingga Abril 2027. Nupay kasta, pinalagipanna ti publiko nga agtalinaed a nakasagana gapu iti posible paylaeng a mapaspasaran a bagyo iti tengnga iti El Niño.
Nangrugi met idi Oktubre 27 ti amihan season a mangitugtugo iti nalammiis ken namaga nga angin, naulep a tangatang ken panagtudo kadagiti daya a paset ti pagilian.











