BAGUIO CITY – Dimmanon iti above normal ti rainfall amount a nailista ditoy Baguio City idi napalabas a lawas gapu iti mapaspasaran a panagbayakabak ti napigsa a tudo gapu iti habagat.
Sigun kenni DOST-PAGASA – Baguio weather observer Wilson Lucando, manipud August 5 agingga August 11 ket nailista ti pakabuklan a 423.6mm a rainfall amount ditoy City of Pines.
Kinunana a ti 423.6mm a rainfall amount ket katukad ti kaadu ti tudo para iti maysa a bulan.
Inlawlawagna a ti normal rainfall amount iti maysa a lawas ket 100mm.
Nailista met ti DOST-PAGASA ti kangatuan a rainfall amount idi kalman manipud napasaran ti hagabat a dimmanon iti 136mm.
Gapu iti daytoy, impangta ti Lucando ti agtultuloy a panagbayakabak ti napigsa a tudo ditoy lokalidad kadagiti masungad nga aldaw.
