BAGUIO CITY – Ipampannakkel ti Bisquera-Bejarin Family sadiay Lipcan, Bangued, Abra ti kabsat dagitoy a maysa kadagiti natured a nagboluntaryo a naipatulod sadiay Wuhan, China tapnu tulungan ken iawid ditoy pagilian dagiti OFWs nga adda iti ground zero ti corona virus disease – 2019 (COVID – 19).
Impeksada met ti panagyamanda kadagiti amin a nangikararag iti kinatalged ti kapamilyada a ni Sanny Darren Bisquera Bejarin nga agserserbi kas Protocol Officer and Attaché ti Philippine Consulate sadiay Shanghai, China.
Naamuan a da Bejarin ken Mark Anthony Geguera ti nagserbi a Rescue Team ti Department of Foreign Affairs (DFA) a nangisayangkat iti repatriation kadagiti OFWs nga adda iti ground zero ti COVID-19.
Naipasidong dagitoy iti 14-day quarantine iti Athletes’ Village sadiay Capas, Tarlac ken naparuar nga adda iti natalged a kondisyon.
Nalaus ti panangipannakkel ti pamilyana kenkuana gapu iti kinasagana ken kinatured daytoy a nagresponde iti panawen a kasapulan ti serbisyona.
Imbingay ti kabsat daytoy nga agtatrabaho metlaeng iti DFA nga idi naamuan ti pamilyada nga adda isuna sadiay Wuhan, China ket nakasangit dagitoy.
Impeksa pay dagiti OFWs a natulongan dagitoy ti panagyamanda kadagiti dua gapu iti panangipasiguradoda a saan pulos a nabisinan dagiti OFWs kabayatan ti panakaipasidong dagitoy iti narikut a proseso tapnu laeng makaruarda sadiay Wuhan.
Kabayatanna, naituding a mapadayawan da Bejarin sadiay Kongreso sakbay nga agsubli iti tour of duty daytoy sadiay Shanghai, China inton March 6.
