Posible a mapasaran ti ad-adda pay a panagbaba iti bilang dagiti turista nga agturong iti Baguio City kadagiti sumarsaruno a lawas nu malpas ti Semana Santa.
Iti panakiuman ti Bombo Radyo kenni Baguio City Mayor Benjamin Magalong, imbinglayna a posible a madanon pay ti agingga 60% a panagbaba iti occupancy dagiti pagdagusan iti siudad maibasar iti bukod a forecast iti Hotel & Restaurant Association of Baguio (HRAB).
Immunan a naobssebaran a bimmasit dagiti agturturong iti Summer Capital gapu iti nangina a presyo ti produkto a petrolyo nu sadino, agpada dagiti agbibiahe a pribado a lugan ken dagiti parapubliko a transportasyon ti naksayan.
Sigun kenni Mayor Magalong, madlaw daytoy gapu ta nawayan dagiti kalkalsada ken saanen unay a nailet ti gunay ti trapiko iti siudad nangruna tunggal weekend a kadawyan nga isu ti panagdudupadop dagiti tattao ken lugan iti siudad
Inlawlawag ti mayor a nupay manamnama nga adda ti ngumatwan ti bilang dagiti sumarungkar iti siudad kadagiti nangina nga aldaw, posible a nababbaba latta daytoy nu idilig iti nairekord iti kapada a panawen idi 2025.//Bombo Rob Dominguez
