BAGUIO CITY – Nagkalintegan ti ama ti Baguio kalpasan a nakaawat ti pammabalaw ti impaulogna nga advisory a dagiti laeng nabakunaan a drivers ti jeep, taxi ken bus ditoy siudad ti mabalin nga agbiyahe.
Sigun kenni Mayor Benjamin Magalong, tarigagay laeng ti lokal a gobyerno a mapagbalin a natalged ti siudad nangruna ita a bumabbaban ti kaso ti COVID-19 iti lokalidad.
Impettengna met nga awan ti pakibiangna kadagiti pammabbabalaw ken ituloyna latta a mangaramid kadagiti responsibilidadna iti panagresponde kontra iti COVID-19 kas mayor ti siudad.
Inaklonna pay a maladingitan daytoy kalpasan a naamuanna nga adu paylaeng kadagiti kameng ti transport sector iti siudad ti saan pay nabakunaan kontra iti COVID-19.
Dinakamatna nga adu paylaeng dagiti agbuteng nga agpabakuna gapu kadagiti nagduduma a rason.
Gapu iti daytoy, ginuyugoyna manen dagiti amin a public utility drivers nga agpabakunadan tapno maprotektaranda manipud iti COVID-19.
Kabayatanna, pinagyamanan met ti mayor dagiti drivers a nagtulnog iti kiddawna a panagpabakuna dagitoy kontra iti COVID-19.
Maibasar iti datus ti Baguio LGU, idi November 8 ken 10 ket pakabuklan a 520 a drivers ti nagpabakuna iti first dose kontra iti COVID-19 kadagiti drive-through sites ti siudad.
Maipalagip a nangrugi idi kalman, November 10 ti panakalimitar ti public transport routes kadagiti laeng vaccinated drivers ti jeep, taxi, UV Express van ken bus.
