Manamnama a sumangpet ti agarup 15-K a COVID-19 vaccine iti siudad ti Baguio inton Hulyo iti agdama a tawen nga ipaay ti Department of Health (DOH).
Iti panakiuman ti Bombo Radyo kenni Dra. Celia Flor Brillantes, City Health Services Officer iti siudad ti Baguio, kinunana a daytoy ket tapno mabakunaan dagiti indibidual a saan pay a nagpabakuna kasta met ti panakaipaay ti booster kadagiti daduma.
Sigun kenni Dra. Brillantes, nangrugi a ngimmato ti kaso ti COVID-19 idi napalpalabas a lawas nu pay kasta 1 digit laeng daytoy ken saan nga “alarming” agsipud ta kaadoan kadagiti maseknan ket nabakunaanen.
Nu pay kasta, agtultuloy ladta ti panangipatungpal ti Department of Health (DOH) iti information dissemination no kasanu a maliklikan ti nasao a sakit.
Daytoy ket babaen ti panagusar ti face mask nangruna kadagiti addaan iti simtomas ti COVID-19, ti panagtalinaed iti uneg ti pagtaengan ken ti panag-ugas ti ima.
Kabayatanna, bambantayan met laeng ti Department of Health ti kaso ti Dengue nangruna ket manamnama a ngumato daytoy kagiddan ti umadanin a paniempo ti La Niña.
Kidkidawen met ni Dra. Brillantes ti panakitinulong ti publiko iti panagdalus kadagiti arubayan dagitoy tapno maliklikan ti dengue a sakit.//Bombo Mera Pacpacan
