BAGUIO CITY – Natiliw ti tallo nga indibidual a nanggandat a mangibiyahe ti agarup P4.8-M a gatad ti marijuana bricks paturong sadiay Metro Manila.
Nabigbig dagitoy a da Mark Anthony Comia, 29-anyos, driver, residente ti Novaliches, Quezon City; Edward Dela Cruz, 35-anyos, driver, residente ti San Roque, Navotas City ken ni Yarielle Lacambra, 22-anyos, estudyante, residente ti Bahay Turo, Quezon City.
Natiliw dagitoy iti joint checkpoint operation dagiti otoridad sadiay Bantay, Tabuk City, Kalinga.
Naisayangkat ti checkpoint operation kalpasan a nakaawat dagiti otoridad iti impormasyon iti panakaibiahe ti kontrabando.
Kabayatan ti checkpoint operation, pinara dagiti otoridad ti maysa a Toyota Innova gaputa awanan daytoy ti plaka ken saan a naka-seatbelt dagiti pasahero.
Nakita pay dagiti pulis ti mapagduadua-an a banag iti uneg ti lugan isut gapuna a nangisayangkatda ti panaginspeksion.
Babaen iti drug-sniffing dog, nailukat ti lugan ken sadiay a nadiskobre ti 40 a maatap a marijuana bricks nga agdagsen ti agarop 40 kilos.
Gapu iti nadiskobre a kontrabando, natiliw dagiti tallo gapu iti kaso a panaglabsing iti Comprehensive Dangerous Drugs Act of 2002.
