BAGUIO CITY – Saan a pabor ti Presidente ti Asosasyon dagiti Operators ken Drivers ti La Trinidad iti subsidy program ti gobierno wenno ti Land Transportation Franchising and Regulatory Board
Agency (LTFRB).
Iti interview ti Bombo Radyo Baguio kenni Miguel Luma-ang, impeksana ti nagbalin a pakaseknan dagiti operators ken drivers iti nasao nga programa ti LTRFB.
Sigun kenkuana 150 nga drivers ti nangisubmitir ti aplikasionda iti nasao nga programa ngem 62 laeng ti nakapagnumar iti ayuda/subsidiya.
Imbinglayna a saan nga naikkan iti naan-anay a pawayway dagiti drivers a mangisagana iti requirements partikular ti intuding ti LTRFB nga kinaadda ti maysa nga online payment application dagitoy wenno ti GCASH.
Kinunana a saan nga amin ket addaan iti nasao nga aplikasyon malaksid a nasken nga addaan dagitoy iti android phone tapnu mailukatda ti sistema.
Inayonna a dumanon laeng iti 3 nga aldaw ti intedda nga pawayway kadagiti drivers rason a saan nga amin kadagitoy ket nakapagnumar iti subsidiya.
Gapu iti daytoy, mangnamnama ni Luma-ang nga nalaklaka laeng ti ikalikagum ti gobierno nga requirements tapnu dagus a maiproseso dagiti benipisaryo.
Kiniddawna pay ti naan-anay a panawen wenno pakdaar kadagiti kasapulan a dokumento tapnu amin dagiti apektado iti agtultuloy a panagngato ti presyo ti petrolyo ket maipaayan iti tulong.
Iti agdama ket maur uray paylaeng ti resulta ti petision dagitoy a manayonan iti ₱3 ti agdama a plete kadagiti Public Utility Jeepney (PUJs).
