Pimmusay ti maysa a rescuer kalpasan a naawanan iti oxygen bayat ti panagrescue da kadagiti natrap a minero iti uneg ti tunnel idiay Runruno, Quezon, Nueva Vizcaya itay malem.
Nabigbig daytoy a ni John Philip Guinihid.
Iti inisyal a report dagiti otoridad, boluntaryo a sinumrek ni John Philip Guinihid ken ti kadwana a ni Johny Ayudan iti uneg ti tunnel tapno iruarda ti bagi ti kabsatna a ni Lipihon Ayudan, maysa kadagiti lima nga small scale miners a natrap idi rabii ti Hunyo 23.
Sigun kenni Pastor Mario dela Cruz ti Philippine Bethel Church, Inc., maysa kadagiti volunteer rescuers a sinumrek iti tunnel, kinakurang ti oxygen ti rason iti pannakaulaw ken pannakapukaw ti puot dagiti lima nga small scale miners iti uneg ti tunnel rason a saandan a nakaruar pay.
Naispal met iti uneg ti tunnel ni Johnny Ayudan, ti kadwa ti pimmusay a rescuer a ni John Philip Guinihid.
Iti agdama ket adda pailaeng iti uneg ti tunnel ken saan pay a narekober ti bagi dagiti tallo a minero a da Lipihon Bumalyad Ayudan, 56-anyos; Daniel Segundo Paggana, 47-anyos ken Florencio Napudo Indopia, 63-anyos, bin-ig a residente ti Runruno nu sadino dagitoy sinumrek iti tunnel idi rabii ti Hunyo 23.
Immuna metten a naispal dagiti dua a kadwada a da Alfred Dulnuan ken Joval Bantiyan idi kalman babaen iti dagus a rescue ken retrieval operations ti BFP, PNP, FCF Minerals Corp., OGPI, BLGU, MLGU ken volunteer groups.
Immunan a kinuna dagiti otoridad maatap a nangipatungpal dagiti biktima iti iligal a panagminas iti kaunegna a 91.44 meters (300 feet) iti nasao a lugar.
