BAGUIO CITY – Iyap-apela ti Holy Ghost Proper Barangay ditoy siudad ti Baguio ti panangaksion ti City Environment and Parks Management office (CEPMO) iti kiddawda a panangsukimat ti nasao nga opisina iti nabayagen a mairekreklamo a pimtuk a sewerage pipeline iti waig a masarakan iti nasao a barangay.
Sigun kenni Punong Barangay Murphy Maspil Sr., pimtuk ti nasao a sewerage pipeline idi pay maudi a kwarter ti 2019 a mangituntunda iti bangsit iti waig sadiay Purok 2 ti barangay, partikular iti sangwanan ti Tibaldo Residence.
Impettengna a nabayagen daytoy a parikut dagiti maseknan a residente ken nupay ininspeksion ti barangay ti reklamo ket narigatanda a mangitudo iti pagtataudan ti bangsit gaputa awananda ti kapasidad.
Innayonna nga adda dagiti dadakkel nga establishimento sadiay a posible a pagtataudan ti rugit a rumrumwar iti pimtuk a sewerage pipeline.
Inyunay-unay ti kapitan a nagsuratda iti CEPMO ken kanayon ti panag-follow-up-da ngem agingga ita ket awan ti aksion ti nasao nga opisina.
Sigun pay kenkuana, agingga ita ket adda latta iti rumrumwar a rugit iti sewerage pipeline isut gapuna a kasapulan ti tulong ti CEPMO tapnu mabigbig dagiti pasdek a pagtataudan dagiti rugit ken tapnu masolosyonan ti pakaseknan.
Naamuan a nakakonektar ti waig iti Sagudin River a maysa a kangrunaan a tributary ti Balili River.
