BAGUIO CITY – Maur-uray laengen ti panangpirma ti mayor ti Baguio iti ordinansa a mangipaay ti amnestiya kadagiti taxpayers a napaay a nangbayad iti buis dagitoy ita a tawen.
Daytoy ket kalpasan nga inaprobaran ti lokal a konseho ti Baguio ti nasao nga ordinansa a mangpalukay kadagiti paglintegan ti panagbayad ti buis ditoy siudad tapnu matulongan dagiti marigatan nga agbayad ti buis gapu iti panaka-apektarda iti agdama a pandemya.
Partikular a napalukay iti nasao nga ordinansa ti agdama a Tax Ordinance a mangikalkalikagum iti panakaipataw ti multa ken surcharges kadagiti saan a nabayadan a buis a nasken a nabayadan kuma iti nagduduma a kwarter ti agdama a tawen.
Saksakupen ti baro nga ordinansa dagiti saan a nabayadan a buis para laeng ita a tawen 2021.
Nabukel ti baro nga ordinansa kas maibasar iti rekomendasyon ti city treasurer kas sungbat iti apela dagiti taxpayers a naapektaran iti agdama a pandemya.
Maipalagip a naipatungpal ti kapada nga amnestiya idi napalabas a tawen kadagiti business establishments a naglukat iti minimal capacity kabayatan ti panakaipasidong ti siudad iti enhanced community quarantine.
Kabayatanna, maisaksakad iti lokal a konseho ti resolusyon para iti panakaipaay ti 50% a diskwento iti sewerage fees a makolkolektar kadagiti business establishments ditoy siudad para ita a tawen.
