Agyamyaman dagiti annak ti 65-anyos a senior citizen a nadungpar sadiay 29 Imelda Barangay Marcos Highway, Baguio City, kadagiti amin a nakipagladingit iti ipupusay ti ama dagitoy.
Iti pannakiuman ti Bombo Radyo kenni Vana Ventura Parchamento ti anak ti biktima, inyebkasna ti panagyamanna agsipud ta adu dagiti nangiyebkas iti pannakipagladingitda iti nasapamak iti amada.
Kinunana a saannan a maibinsa-binsa a mapagyamanan dagitoy gaputa makumikomda paylaeng iti agdama.
Maipalagip a pimmusay ti ama dagitoy kalpasan a dinungpar daytoy ti lugan nga imanmaneho ti suspek a nairidip gaputa mapapati a nahang-over daytoy.
Kagiddan dayta, imbinglayna metlaeng a saanda paylaeng a naaklon ti napasamak iti amada ken shocked paylaeng dagitoy iti napasamak.
Impettengna a saanda a ninamnama daytoy nga insidente gaputa nasingpet, responsable ken naannad ti amada nangruna idi taxi driver pay daytoy agingga a nagretero iti panagmanehona.
Gapu iti dayta, iti uneg ti agarup 44 a tawen a panagmanmanehona iti taxi ket saan a pulos a nairamraman daytoy iti aniaman nga aksidente.
Kabayatanna, nakapagpiansa metten ti suspect a nangdungpar iti ama dagitoy.
Iti agdama, manarimaan paylaeng a mabambantayan ti bangkay ti ama dagitoy.
Kabayatanna, nagpalagip dagitoy kadagiti amin a drivers nga agannad ken liklikan nga agmaneho no nakakainom iti arak, makaturturog, hang-over ken dadduma pay tapno maliklikan ti kapada nga insidente.
