Posible a mangbukel iti anti-theft team ti Baguio City Police Office ita a summer vacation, sigun kenni Baguio City Police Office City Director PCOL. Ruel D. Tagel.
Iti pannakiuman ti Bombo Radyo kenkuana, kinunana a ti anti-theft team ket buklen dagiti uniformed ken non-uniformed personnel ti Baguio City Police Office.
Babaen iti daytoy ket maipasigurado ti saan a panagraira dagiti agtatakaw iti siudad kabayatan ti summer vacation.
Innayon pay ni PCOL. Tagel a kanayonda a palpalagipan dagiti kameng ti pulisya a ti kangrunaan a trabaho dagitoy ket ti crime prevention.
Sigun iti nasao nga opisial, magun-od daytoy babaen iti pannakaideploy dagiti personnelda kadagiti nagduduma a paset ti siudad ti Baguio.
Impanamnama met daytoy nga umdas ti bilang dagiti personnelda nga agbantay nangruna kadagiti tourist areas wenno kadagiti lugar a kadawyan a pagpaspasyaran dagiti turista.
