Imbasura ti Office of the Ombudsman ti apela a motion for reconsideration nga impila ni Bamban, Tarlac Mayor Alice Guo, ken dua a dadduma pay mainaig iti pannakasuspindir daytoy gapu iti maatap a pakainaiganna iti iligal a Philippine Offshore Gaming Operators (POGOs) iti nasao a munisipyu.
Iti desision a napetsaan ti Hunio 18 a naipablaak ita laeng nga aldaw, naduktalan ti Ombudsman nga awan ti aniaman a rason tapno maikonsidera ti “preventive suspension order” kontra kenni Guo, Edwin Campo, ken Adenn Sigua.
Itay laeng nabiit, impaganetget ti kampo ni Guo a ti ebidensia kontra iti mayor ket saan a natibker, rason tapno maikkat ti pammilin a “suspension” kontra kenkuana.
Inlawlawag ti Ombudsman a ti “preventive suspension” ket saan a pannusa ngem maysa laeng daytoy a “preliminary step” wenno wagas para iti panagimbestigar.
Sigun pay iti nasao nga ahensia, panggep ti “preventive suspension” a maliklikan a maaramat ti posision ken pannakabalin kas maysa a mayor para iti aniaman nga addang.
Ti pannakaibasura ti apela ni Guo ket kasaruno ti pannakaikatna kas miembro ti Nationalist People’s Coalition (NPC) gapu iti maatap a pakainaiganna iti POGO iti nasao a munisipyu.
Nabagaan metten daytoy a naikkat iti nasao a partido babaen ti “notice” a naipaay kenni party secretary-general Mark Llandro Mendoza.
