BAGUIO CITY – Agtultuloy nga agaw-awat ti Baguio City Social Welfare and Development Office kadagiti solo parents nga agtarigagay nga agaplikar ti Solo parent ID Card tapno makapagnumar iti nagduduma a benepisyo.
Nasken nga isumiter dagiti aplikante dagiti requirements kadagiti Social Workers a nakaasign iti masakupanda a barangay para iti assessment ken validation.
Karaman ditoy ti birth certificates dagiti menor de edad nga annakda, original copy ti barangay certificate of residency, affidavit of 2 disinterested persons (daytoy ket maiyaplikar kadagiti naabandona, naisina, saan a naikallaysa ken balo nga asawa iti nasurok maysa a tawen), medical certificate para kadagiti aplikante nga addaan ti asawa nga addaan iti disabilidad wenno saan a makatrabaho, certificate of legal separation, certificate of finality of marriage, certificate from jail para kadagiti aplikante nga addaan asawa a nakabalod iti maysa a tawen, death certificate of spouse ken income tax return wenno payslip para kadagiti working applicants.
Ti Expanded Solo Parents Welfare Act a nagbalin a linteg idi Hunyo 4 ket mangipaay ti kanayonan a benepisyo kadagiti single parents.
