Agtalinaed ni sigud a Negros Oriental Congresman Arnolfo “Arnie” Teves Jr. iti detention facility ti National Bureau of Investigation (NBI) iti New Bilibid Prison (NBP) idiay Muntinlupa City agingga iti naituding nga “arraignment” daytoy.
Sigun kenni Department of Justice (DOJ) spokesperson Mico Clavano, awan pay ti naawatda a pammilin manipod iti korte para iti naka-schedule nga arraignment kontra kenni Teves.
Gapu iti dayta, agingga nga awan pay ti naipaulog a pammilin ti korte, agtalinaed latta a nakabalud ti sigud a mammanday-linteg iti nasao a pasilidad.
Ni Teves ket sumangsango iti nagtutuon a kaso a “murder” iti Manila Regional Trial Court Branch 12, Branch 15 ken iti Bayawan RTC Branch 63.
Sumangsango metlaeng ni Teves kadagiti kaso ti illegal possession of firearms ken explosives iti Manila RTC Branch 12; panaglabsing iti Terrorism Financing Prevention and Suppression Act of 2012 a naipila iti Quezon City RTC Branch 77; ken maysa pay a kaso ti Terrorism Financing Prevention and Suppression Act of 2012 iti Quezon City RTC Branch 77.
