Agtultuloy latta ti panangipatungpal dagiti otoridad iti automated counting machine (ACM) demonstration kadagiti nagduduma a lugar iti siudad ti Baguio.
Iti pannaikiuman ti Bombo Radyo kenni Atty. John Paul Martin, Commission on Elections officer iti siudad ti Baguio, kinunana nga agarup uppat a pulo dagiti lugar a nangipatungpalanda iti nasao a demonstration.
Malaksid iti dayta, adda metlaeng dagiti naka-schedule a pagturunganda ita nga aldaw agingga inton Enero trentay uno tapno mapakaammuan ken maisurwan dagiti botante nga agaramat iti baro a makina.
Kabayatanna, pangpanggepen met dagitoy nga agaramid iti video nga ipablaakda iti social media tapno maisurwan dagiti saan a nakipaset iti nasao a demonstration.
Iti sabali a bangir, nainget ti panangipatungpalda iti election gun ban iti siudad kas panangsurot iti pagalagadan ti Commission on Elections para iti masungad a 2025 national ken local elections.
Impettengna met nga awan ti natiliwan dagitoy rason a namnamaenna a sapay kuma ta agtultuloy nga awan ti aglabsing iti nasao a pagalagadan.
