Inlawlawag ti abogado daydi sigud a Department of Public Works and Highways(DPWH) Undersecretary Maria Catalina Cabral a saan a naipaima kadakuada dagiti agarop innem a kahon iti dokumento a posible a naglaon iti napapateg a datos maipapan kadagiti budget insertions.
Iti interview kenni Atty. Mae Divinagracia, impudnona nga adda ti impakita daydi Cabral kadakuada nga innem a kahon iti dokumento nga innala metlaeng ti sigud nga opisyal manipod iti opisina daytoy.
Dagiti nasao a dokumento ket maatap a naglaon kadagiti preparasyon iti nasao nga ahensya iti annual budget proposal dagitoy manipod 2023 agingga 2025.
Nupay kasta, kinuna ti abogado a saan a naipaima daytoy kadakuada sakbay a pimmusay ni Cabral rason nga iti agdama ket saandan nga ammo kasta metten ti pamilya ti sigud nga opisyal ti ayan dagiti nasao a kahon dagiti dokumento.
Maipalagip a karaman daydi Cabral kadagiti maibagbaga nga adda pakainaiganna kadagiti naanomalyaan a flood control projects gapu iti akem ti opisina daytoy kadagiti insertions iti national budget.
Nupay kasta, idi laeng Disyembre ket nasarakan ti bangkay daytoy iti paset iti Kennon Road, Tuba, Benguet asideg iti Bued River.
