Baguio City Mayor Benjamin Magalong, impannakelna dagiti nagduduma a kultura iti siyudad ti Baguio kagiddan ti panakaipatungpal ti Little China Town
Impannakel ni Baguio City Mayor Benjamin Magalong dagiti nagduduma a kultura iti siyudad ti Baguio bayat ti naipatungpal a Little China Town sadiay Session Road idi kalman.
Sigun kenni Magalong, nagduduma a kultura ti maobserbaran iti siyudad ti Baguio gapu ta ado dagiti indibidual nga agnanaed a tubo manipud kadagiti nagduduma a paset ti pagilian kasta metten kadagiti sabali a pagilian.
Innayon ni Magalong a daytoy ti maysa a naisangsangayan a kalidad ti siyudad ti Baguio.
Iti panakarambak ti Spring Festival 2025, impeksa ni Magalong a ti aktibidad a Little China Town ti maysa a mangipakpakita iti nasayaat a relasyon ti Filipino-Chinese community ken kadagiti residente iti siyudad ti Baguio.
Kabayatanna, agyamyaman met ni Olivia Ong, dadaulo iti Chinese-Filipino youth incorporated kadagiti amin a turista ken residente iti siyudad gapu iti agtultuloy a panangsuportada iti selebrasyon ti Spring Festival tunggal tawen tapno mas tumibker pay ti relasyon dagiti Pilipino ken Chinese a komunidad.
