BAGUIO CITY – Pimmusay ti maysa a balasang nga adda iti impluwensia ti arak kalpasan nga aksidente a nadungpar ken inatalan ti parapasahero a bus sadiay Km. 6, La Trinidad, Benguet idi parbangon.
Nabigbig daytoy a ni Sarah Jane Galbino Diosan, 22-anyos, service crew, tubo ti Agawa, Besao, Mountain Province ken residente ti La Trinidad, Benguet.
Nabigbig met ti driver ti bus a ni Dave Bangcado, 27-anyos, tubo ti Aritao, Nueva Vizcaya ken residente ti San Luis Extension, Baguio City.
Sigun kenni PSSgt. Davidson Laguing, imbestigador ti La Trinidad Municipal Police Station – Traffic Unit, paturong iti direksion ti Shilan, La Trinidad ti bus nga addaan plaka nga AYU 865 ken ruta a Baguio-Bontoc nga imanmaneho ni Bangcado para iti first trip daytoy.
Nupay kasta, idi nakadteng iti sangwanan ti maysa a balay paginuman sadiay Kilometer 6 ket sadiay nga aksidente a nadungparna ken naatalanna ti biktima a nakatugar iti sentro ti kalsada.
Kinuna ti imbestigador a nabartek ti biktima ken namin adun a daras a nagturong iti sentro ti kalsada a nagid-idda ken nagtugtugaw ngem linislisyan daytoy dagiti limmablabas a lugan.
Kinunana a patien dagiti testigo a ginangandat ti biktima nga agkettel iti bukodna a biag babaen iti panagpa-atalna.
Nupay kasta, idi dumalan kuma iti nasao a disso ti bus nga imanmaneho ni Bangcado ket saannan a nalisyan ti biktima gaputa sigun iti driver ket saanna a nakita ti biktima gaputa nangisit ti maris dagiti bado daytoy.
Kinuna ni Laguing a nagsagrap ti biktima iti nakaro a dundunor a nagresulta tapnu maideklara daytoy a dead on arrival iti pagagasan.
Iti agdama, ur-urayen ti pulisya ti pamilya ti biktima para iti disposisyon ti kaso ken ti panakaiyawid ti bangkay bayat nga agtaltalinaed ti driver iti lock-up cell iti istasyon ti pulisya sadiay La Trinidad, Benguet.
Kabayatanna, iti rekord ti Bombo Radyo, naamuan a siguden a nairaman ni Bangcado iti aksidente iti kalsada gaputa daytoy ti driver ti bus a dinungpar ti maysa pay a bus sadiay Mountain Province idi May 24, 2019 a nakadangran ti 27 a pasahero.
