Dumanonen iti uppat a gasot pito pulo ket dua (472) a Barangay ti naapektaran iti African swine fever (ASF), manipud iti immuna a bilang daytoy nga uppat a gasot lima pulo ket walo sigun iti Department of Agriculture (DA).
Maibasar iti datos manipud iti Bureau of Animal Industry (BAI), sangapulo ket uppat a barangay ti nainayon kadagiti “red” wenno African swine fever -infected zones bayat a sangagasot sangapulo ket lima a munisipyo, tallo pulo ket dua probinsia ken sangapulo ket lima a rehion ti napektaran iti nasao a virus.
Kadagiti probinsia, nakairekord ti North Cotabato ti kangatuan a bilang dagiti barangay a naapektaran iti nasao a virus nga addaan iti 108, sinaruno ti Batangas nga addaan iti 96, probinsia ti Quezon nga addaan iti 91 ken La Union nga addaan iti 30.
Gapu iti panagadu ti kaso ti nasao a virus, binabalaw ni Senator Cynthia Villar ti Deparment of Agriculture gapu iti saanda a pananglapped iti nasao a sakit.
Pinagduaduaanna pay ti Department of Agriculture vaccination trial ken ti saan a pannakausar ti maysa nga ASF border facility sadiay Bulacan tapno mapasardeng ti panagwaras daytoy
Kabayatanna, indagadag ni Villar, chairperson ti Senate committee on agriculture kenni President Ferdinand Marcos Jr. nga ideklarana ti state of national calamity gapu iti nasao a virus, agsipudta saan a pulos a bimmaba ti kaso ti African swine fever iti pagilian ken agtultuloy ngumat-ngato daytoy.
