BAGUIO CITY – Tinagiragsak ti grupo dagiti minero iti probinsia ti Benguet ti panakapirma ti linteg a nangikat iti buis a baybayadan dagiti small-scale miners nga agilaklako ti balitokda iti Bangko Sentral ng Pilipinas (BSP).
Sigun kenni Engr. Lomino Kaniteng, presidente ti Benguet Federation of Small-Scale Miners, dakkel a tulong daytoy kadagiti minero iti kanito a naan-anay nga agsubli ti operasyon ti small-scall mining iti Benguet ken iti entero a Cordillera.
Maipalagip a gapu iti killer landslide nga epekto ti bagyo nga Ompong sadiay Itogon idi napalabas a tawen ket indeklara ni DENR Secretary Roy Cimatu ti small-scale mining ban iti entero a Cordillera.
Inlawlawagna a dumanon iti lima a porsiento a buis ti baybayadan wenno maikissay iti gatad ti balitok dagiti minero a mailako iti Central Bank malaksid iti baybayadanda a processing fee sakbayda a makailako ti balitok sadiay.
Inaklonna nga ado kadagiti miembroda ti mangilaklako iti balitokda kadagiti lokal a gold buyers gapu iti dakkel a buis a masingsingir kadagitoy.
