BAGUIO CITY – Impaulog ni Baguio City Mayor Benjamin Magalong ti sumagmamano a pagalagadan iti panagala ti baro a travel permit.
Babaen iti daytoy ket maliklikan ti panaka-aramat dagiti peke ken saan nga otorisado a vehicle permits ken iti panagtungpal kadagiti paglintegan ti manarimaan nga Enhanced Community Quarantine.
Maibasar iti baro a pagalagadan, nasken nga agala iti Travel Permit manipud iti Office of the City Mayor dagiti pribado ken awanan marka a lugan a maar-aramat kas service vehicles para iti food delivery services, errand services, shuttles dagiti Authorized Person Outside Residence ken para iti panakaiwaras ti relief goods manipud kadagiti pribado nga umili ken organisasyon.
Nasken nga iti panagala iti Travel Permits dagiti adda iti food delivery services ken errand services ket iparangda ti Business Permit wenno aniaman a pammaneknek a lehitimo ti negosyoda.
Maikalkalikagum met ti panangiparang dagiti agap-aplikar iti Authorized Person Outside Residence Shuttle Travel Permit iti Certification of Engagement kas shuttle service manipud iti negosyo wenno establishimento nga ipapaayanda iti shuttle services.
Kasapulan met a mangiparang iti pammaneknek dagiti agap-aplikar para iti travel permits para iti panakaiwaras ti relief goods kadagiti front liners ken health workers.
Malaksid kadagiti maikalkalikagum a dokumento, nasken pay nga iparang dagiti amin nga aplikante ti kopya ti official receipt wenno certificate of registration ti lugan dagitoy.
